Zuen disko berria Durango Azokara begira kaleratu zenuten, harrera ezin hobea izan duzue ezta?

Bai, oso gustura gaude izan duen harreragatik, gaur egun geroz eta zailagoa da diskoak saltzea. Aitzitik, Durangoko azokari esker, salmentak gutxi gora behera mantentzen dira. Oso kontent gaude.

Zelan definituko zenukete lan berriaren arima hitz bitan?
Ilusioa eta sentimendua.

Grabaketa iazko udan burutu zenuten, zer moduzkoak izan zen Bartzelonako estudioetan bizitako esperientzia?

Esperientzia ahaztezina izan zen. Hilabete pasa genuen Cerdanyola del Valles eta Sant Feliu de Guixols herrietan. Nahiz eta gogorra izan. lortutako emaitzarekin oso gustura geratu gara. Bertan ezagututako jendearekin oso harreman ona dugu.  Aurreko bi diskoak Haritz Harreguy-rekin  grabatu genituen Euskal Herrian bertan, grabaketa eta nahasketa lanak Txosse eta Santi Garciaren  esku izan zirelarik.

Entzule saria irabazi zenutenetik bilakaera nabaria izan duzue…

Aurrera pauso bat izan zen. Izan ere, irratian agertzeak jendearengana iristeko erraztasun handiagoa eman zigun, ondorioz kontzertuak emateko aukerak areagotu ziren. Honek, diskoetxe batekin kontaktuan jarri gintuen… eta dagoeneko hirugarren diskoa argitaratu dugu!

Zenbat urterekin hasi zinetan musikari lanetan?

Mikel eta biok (Adrian) 18-19 urterekin hasi ginen, Kautarekin batera. Gorka ordea betidanik darama bateria jotzen , 9 urte zituela hasi zen.

Hastapenak zailak izan al ziren?

Lagun koadrila  bat ginen, talde gehienak bezala hobby moduan murgildu ginen musikagintzan. Lehen entseguak, abestiak, lehen kontzertua, maketa… baita zozketak burutu ere soinu ekipoa erosteko. Hastapenak ez dira batere errazak izaten, hala ere, zailagoa izaten da urteak pasa ahala merkatuan indartsu jarraitu  eta hasieran bezain gogotsu egotea.

Zein gomendio emango zenieke hasi berri diren musikariei?

Gogo handiak  izatea, musika asko entzutea eta ahalik eta kontzertu gehien ematea.

Sugan taldearekin batera zuzeneko kontzertu bat eskainiko duzue Bilborock aretoan, zerbait aurreratzerik bai?

18-19 bat abesti prestatu ditugu Bilbon eskainiko dugun kontzertura begira. Azken disko osoa joko dugu, baita lehenengo eta bigarren diskoko hainbat abesti ere.

Zer suposatzen du Harrapazank bezalako programa arrakastatsu baten parte hartzeak?
Ilusio handia egiten digu horrelako programa batean parte hartzeak; gogotsu gabiltza; martxoaren 13a iristeko zain.

Jarraitzaileekin zuzenekoetan duzuen hartu-emana zelan definituko zenukete?
Kontzertuetako gauzarik handiena jarraitzaileekin sortzen den hartu-emana da. Hain da berezia… Ezin genezake hitzekin adierazi bertan sentitzen duguna.

Publiko fidela duzue biretan, eskenatokitik kanpo ba al duzue harremanik?

Internet bidez zaletu askorekin zuzeneko harremana dugu. Gaur egungo teknologiek norabide biko komunikazioa lantzea errazten dute. Guk batez ere Myspace, Tuenti eta Facebook erabiltzen ditugu gure zaleen iritzi, proposamenak jaso zein harremanak garatzeko.

Bilborock-en zuen hitzak abesten izango diren gazteeentzako mezurik…
Kontzertu polita izango da Bilborock-ekoa, areto ederra da eta Sugan taldearekin batera
primeran pasako dugu! Animatu! Harrapazank aukera.